(၁) ကျွန်တော်နှင့် မျိုးရိုးဗီဇ
ကျွန်တော်ငယ်ငယ်တုန်းက အမေမကြာခဏပြောဖူးသည်။
အမှန်တော့ ကျွန်တော်သိပ်နားမလည်ပါ။ တန်ဖိုးတစ်ခုကို ဘာပေတံနဲ့ တိုင်းတာသလဲ။ ထာဝရအမှန် အမှားဆိုတာရော တကယ်ရှိသလား။ ကိုယ့်မျိုးရိုးကို ဂုဏ်ယူတတ်ဖို့ တခြားသူကိုထိခိုက်စရာလိုသလား။ တကယ်တမ်းတော့ အဖေကျွန်တော့်ကို စိတ်ပျက်နေတာ ကြာပြီ။ ပြောရရင် အဖေက ဒီဒေသမှာ အကုန်လုံး လေးစားခင်မင် အားကိုးမှုကို ရထားသူ။ မျက်နှာကြီးပေါ့။ ကျွန်တော်ကတော့ (အဖေ့စကားအရ) စောက်တလွဲကောင် မျိုးရိုး သိက္ခာချတဲ့ကောင် မျိုးမစစ်ကောင် စသည်ဖြစ် နာမည်မျိုးစုံ ခေါ်ဝေါ်ခံရလေ့ရှိသည်။ (သူ့လိုဖြစ်စေချင်တဲ့ အဖေရဲ့စေတနာကိုတော့ ကျွန်တော်နားလည် ခံစားရ ပါတယ်။)
“ အမေတို့မျိူးရိုးဟာသာမန်မဟုတ်ဘူး။ အခု လူလို့ခေါ်တဲ့ သတ္တာဝါတွေဟာ အမေတို့ ဆီကဆင်းသက်တာ။ အမေတို့ဟာ မျောက်မျိူးစိတ်ထဲမှာအမြင့်ဆုံး အမြတ်ဆုံး။ ဒါကို ဂုဏ်ယူတတ်ရမယ်သား “
(၂) ကျွန်တော်နှင့် ပြင်ပလောက
ကျွန်တော် အရွယ်ရောက်တော့ စူးစမ်းချင်သော စိတ်ကအတော မသတ်နိုင်သေး။ ရွယ်တူတွေက မျောက်တို့ တတ်အံ့သော ကိုယ်ခံပညာ အသက်မွေးဝမ်းကျောင်း ဆိုင်ရာ အတတ်ပညာများ သင်ယူလေ့လာ တတ်မြောက်ဖို့ အသီးသီးကြိုးစားနေကြချိန်မှာ ကျွန်တော်က ပတ်ဝန်းကျင်ဆိုင်ရာ စူးစမ်းမှုတွေလုပ်၊ တခြားမျိူးမတူတဲ့ သတ္တဝါတွေဆီသွားပြီး သူတို့ရဲ့ ဓလေ့ထုံးစံတွေ လေ့လာ၊ ဒီလိုနဲ့ပဲ ဘာသာစကားမျိုးစုံ သင်ယူတတ်မြောက် လာသည်။ မျိုးရိုးမတူတဲ့ မိတ်ဆွေသူငယ်ချင်းများရဲ့မှတ်ချက်တွေ အယူအဆတွေ နားထောင်ရင်းနဲ့ ကျွန်တော် တို့မျောက်မျိုးရိုးတွေ ကိုယ့်ကိုကိုယ် ကပ်သီးကပ်သပ် ဂုဏ်ယူနေကြတာကို နားလည်လာသည်။ အင်အား ပါဝါ တွေ ကြီးလာအောင် ကြိုးစားပြီး ကိုယ့်ထက်အားနည်းတဲ့ သူတွေအပေါ် လွှမ်းမိုးအနိုင်ယူချင်နေတာတွေ နားလည်လာသည်။ သူတို့ကတော့ ကိုယ့်ကိုကိုယ် ကာကွယ်ခြင်း လို့နာမည်တပ်ထားကြသည်။မျိုးရိုးဝါဒတွေ နေ့တိုင်း သင်ကြားပြီးတော့ ပုံစံသွင်းထားကြသည်။ သို့နှင့် ပြောဆိုဆုံးမ မရသော ကျွန်တော့်ကို အဖေက ခေါ်ပြီး
”မင်းးဒီဒေသမှာ နေချင်ရင် ငါတို့ပြောတာလိုက်နာ ဒါမှမဟုတ် ဒီကထွက်သွား”
လို့တစ်ခွန်းတည်း ပြောလေသည်။
(၃) ကျွန်တော်နှင့် ကတ္တီပါလမ်းခွဲ
ဒီမြေမှာကြီး ဒီလေကို ရှူရှိက်ပြီး အသက်ရှင်သန်လာခဲ့သော ကျွန်တော့်ရဲ့သွေးကတော့ ဒီမျိူးရိုးစစ်စစ်ပါ။ ဒါပေမယ့် မတူညီတာတွေ ဝတ်ဆင်ချင်ခဲ့သူ မတူညီမှုတွေကို အလှတရားတစ်ခုအဖြစ် ပေါင်းစပ်ချင်ခဲ့သူ တစ်ဦးသာဖြစ်သည်။ ကျွန်တော်က စွန့်ခွာသွားခဲ့တာလား ကျွန်တော့ကို စွန့်ခွာသွားခဲ့တာလား မသေချာပေမယ့် ဒီဒေသကတော့ ကျွန်တော့ရင်ဘတ်ထဲမှာ စွဲမြဲစွာ ကျန်ရစ်နေဆဲပါ။
"တကယ်တော့ ကျွန်တော်သည် အခွံချွပ်ထားသော မျောက်တစ်ကောင်သာ ဖြစ်သည်။"
(မင်းမွန်သစ်)
No comments:
Post a Comment